Дар дастгоҳи марказии Саридораи ҳифзи сирри давлатӣ бо мақсади иҷрои қарори Ҳукумати Ҷумҳурии Тоҷикистон аз 5 августи соли 2023, №357 «Дар бораи Стратегияи миллии Ҷумҳурии Тоҷикистон дар соҳаи ҳуқуқи инсон барои давраи то соли 2038» бо иштироки номзади илмҳои ҳуқуқшиносӣ  намояндаи Донишкадаи такмили ихтисоси назди  Вазорати адлияи Ҷумҳурии Тоҷикистон Абдуҳомидзода Акмал Маҳмадӣ машғулияти омӯзишӣ бо ҳайати шахсии кормандони дастгоҳи марказии Саридора баргузор карда шуд.

        Машғулияти мазкур ҷиҳати баланд бардоштани сатҳи огоҳӣ ва маърифати ҳуқуқии хизматчиёни давлатӣ доир гардида, иштирокчиён бо мазмуну муҳтавои Стратегияи миллӣ, ҳадафҳои асосӣ, самтҳои афзалиятнок ва тадбирҳои амалисозии он дар самти ҳифз ва рушди ҳуқуқу озодиҳои инсон дар Ҷумҳурии Тоҷикистон шинос гардиданд.

        Дар раванди омӯзиш Абдуҳомидзода Акмал Маҳмадӣ доир ба аҳаммияти сиёсати давлатӣ дар соҳаи ҳуқуқи инсон, нақши мақомоти давлатӣ дар татбиқи самаранокии он, ҳамкориҳои байниидоравӣ ва ҷалби ҷомеаи шаҳрвандӣ ибрози андеша намуд.

       Ҳамчунин, масъалаҳои марбут ба рушди фарҳанги ҳуқуқӣ, тарғибу ташвиқи арзишҳои демократӣ, таъмини шаффофият, масъулиятнокӣ ва дастрасӣ ба адолати судӣ мавриди муҳокима қарор гирифта, саволу ҷавоб ва мубодилаи афкор миёни иштирокчиён сурат гирифт.

       Машғулияти омӯзишӣ дар фазои озоду созанда ҷараён гирифта, ба таҳкими донишҳои касбӣ, эҳсоси масъулият дар назди қонун ва такмили малакаҳои хизматчиёни давлатӣ дар самти татбиқи сиёсати давлатӣ дар соҳаи ҳуқуқи инсон мусоидат хоҳад намуд.